住宿篇

名古屋新幹線口東橫inn ¥7,560

位置可算便利，由新幹線那邊出口，過左大馬路行入一條街即到，在大馬路口仲有 bic camera。酒店裝修同一般東橫inn冇分別，但係間房同走廊就大好多，twin room仲有兩張4呎床，係意外驚喜，因此估計佢係收購其他酒店改建而成的。

飛驒古川 – 大村屋(民宿)  ¥12,600

下午4時許到達(check in 時間係3時開始)，係玄關按玲超過10分鐘都冇人出現，再按玲又大聲打招呼好耐，終於有個太太行出黎，態度冷淡，問佢架車停係邊，就叫我地停係佢隔離個停車場，講完後即閃番入房，結果d行李放係玄關無人看管地去泊車。泊完車番黎又等左一陣先出黎帶我地去房。

估計佢冇開暖氣，全間民宿都好似係條街一樣咁凍，間房有一個暖風機，要坐係前面先覺得暖，tatami 有一張電暖毯好細張，膊頭同腳成晚都好凍。俾完錢走都唔會講bye-bye，真係好唔似日本人，總結成間民宿無論人同物都－好凍。

好凍既早餐

日式家庭浴室，唯一唔凍既地方

下呂観光ホテル  ¥39,900

1點去到酒店，因為太早關係，間酒店冇人冇車，去front desk問可唔可以早d check in，佢話要3點後，於是要了張地圖就走了。

4點再黎，完全唔同晒，一去到門口已經有人迎接，幫我地拎行李同泊車，又帶我地去大堂，安排一個人去check in，另一個就去sofa等，即刻有茶點供應。

等大家都休息完，有專人幫我地拎埋d手提行李帶我地上房，沿途仲介紹酒店設施。每個房門口都掛有訂房人姓氏。

間房好滿意，好大好靚，個view好好，toilet燈係感應式，行入去自動著，不過如果坐得耐要郁下，唔係會黑晒。

今次落重本book左附露天風呂既房，打算要不停浸唔好蝕，點知都係浸左一早一晚兩次，好好feel，不過試過就算，以後都係唔洗咁奢侈。

晚餐book左個飛驒牛會席，去到食堂門口有專人帶我地去我地張臺，臺面有我既姓氏名牌同會席menu，好high咁，但係估唔到最驚喜既係每臺一條長滿冬菇既枯木，當然有人教我地點摘d菇落泥燒，好好味，每一度菜都有人教點食。

燒錫紙焗蜆

魚天婦羅

飛驒牛同飛驒走地鶏

係日本唯一食晒既甜品

燒魚，刺身等影得唔好，冇post上來。食完走既時候，發現鞋上放了名牌以免著錯，真係好細心。

食飽飽行下shop，然後去左休息室（係溫泉出面，俾人等朋友），有免費自助咖啡、茶供應，可以聽cd、睇雜誌，仲有一部mac機可上網，不過部機有d慢。

返房發現有果味酒送上放了係電視機旁邊，仲點了洋燭，好浪漫啊。

早餐都好ok，帶埋行李去check out，跟住俾番條車匙我，上面掛有一個”手形”上面當然寫左我既姓同房number，有人幫我地拎行李放上車，車子離開一段路從倒後鏡上仲見到他們還在揮手呢。

總括來說這間酒店服務一流，食物都好好，如果想豪一次不妨一試。正!!!

高山民宿 – 桑谷屋  10,380

上次黎都係住呢間，離火車站同朝市都好近(因為高山市唔大)，在國分寺對面。上次佢只有兩、三個車位，但係而家有十幾個，睇黎生意唔錯。

老闆比起大村屋親切好多，食物又好好多(或許只係一般，不過大村屋實在太差)，但係舊左d。

係咁大(唔計停車場)

兩次都係住呢間(最大既雙人房)

早餐有高山名物，不過唔知點解個蛋係烚蛋，

而日本人係生蛋，叫佢俾生蛋佢話不可思議

ホテル穗高  ¥32,000

好早去到，間酒店冇乜職員出現，front desk又冇鐘，成日等人發現我地，佢冇乜人又唔俾我地早d check-in，勁有原則。

於是去食lunch，好一般既餐廳，只有一檯客，點知仲話只招呼預訂客，叫我地去lobby既coffee shop食，去到坐左好耐都冇人理，又去front desk等人發現，得一個餐，個餐茶又係要去front desk等人發現先至叫到，服務差。

沒有什麼期待地去食晚餐，以為係去果間唔睇得既餐廳，點知一出電梯就有個女仔等我地，帶我地去日式餐廳，門口仲寫左我地既房number，原來係包場，個場都ok，開心返晒。

全景，不過好多野都係一路食一路黎

新鮮紅棗

生牛肉

牛肉剌身

樣好似透明既米粉，食落好似清水

係小賣店發現

好Q既原隻小蕃茄

有料飯ok，不過白飯比較襯牛

牛肉烏冬

當然又係食飛驒牛會席，但係一路上都食唔到似樣既飛驒牛，極失望之際，黎一餐可以挽回飛驒牛既聲譽。一見到個樣已經覺得好開心，佢即刻叫我們飲杯餐前酒，用水晶杯裝著賣相好靚，仲好好飲，即刻問佢係咩酒，原來係柚子酒，但係係自製無得賣！跟住食牛剌身，簡直無得彈。之後每一道菜都無令人失望「好好味呀！」係呢餐飯出現了約一百次。飛驒牛 vs 神戶牛，真係有過之而無不及既感覺，可能我沒有食個很貴的神戶牛，但係飛驒牛真的好好味。個menu仲mark左隻牛個number，真係信心既保證(可能係咁多生牛肉，食左有事都可以跟進)。

本來black list左呢間酒店，諗住返來唱衰佢，因為這一餐反敗為勝，仲嬴埋服務一流既下呂酒店。食完飯行下shop，除了一個職員(終於有人企係到)周圍都冇人，好奇怪，就問下職員係唔係得我地兩個客，點知真係，佢話因為唔係假期所以有時會好少人，好勁，竟然包酒店都係第一次。第一件諗起既事就係明早去影一輯出浴照（無人理會）。

早餐都唔令人失望

好靚既風呂，室內都有室外feel，而露天果part，細心驗證後，發現係比較外圍地方，可以見到一d窗，唔知係客房、staff房、….

東橫 inn 金沢香林坊  ¥7,140

個停車場竟然要用電話預約，internet冇講又冇得約，1 day要yen800，不過時間跟check-in check-out time一樣。

名古屋•榮 - the b nagoya  (package)

外觀

Front desk

自助早餐一角

裝修年青，twin room有兩張4呎床，不過d staff唔係好nice。本來都感覺ok，點知第一晚成晚都好噪，仲以為有……。第2晚好好多，可能第一晚係星期六晚，d人玩到好夜，而且間酒店d隔音好差。